مقتطف رائع من قصيدة وصفية زجلية للشاعر : محمادي بورمطان
يصف فيه بعض مناطق و بعض قبائل ايت وراين :
الجولة الاولى :
مَنْ تاهلا مْشيتْ بويبلان
دَزْتْ قْبايَل مْعَ طَرْقانْ
نْسَقْسي وَنْسالْ فَلْبَلْدانْ
عْلى سَعْدي داك لْعيَّانْ
ما صَبْتو ما بانْ لِيَّا ..
فُوقْ موسى شَدْني لْخُوفْ
دَرْتْ لَشَّرْقْ ولْغَرْبْ نْشوفْ
داخْ راسي قلبي مخطوفْ
وَنَا هْنَايَا ما معروفْ
شْكونْ ئِجِي ئِحَنْ عْلِيَّا ..
نْزَلْتْ لَشَّرْقْ عَنْدْ ايت سمنت
وْصلْتْ تامجيلت تما سولت
حَدْ ما جاوبني ورجعتْ
عَنْدْ ايت بورايس دْخَلْتْ
صادفتني واحَدْ لَبْنِيَّا ..
لَوْجَه حْمَرْ كيف رَّمَّانْ
كِيفْ لْعين كِيفْ لْحَجْبانْ
شَدَّتْ يدي وَنا دَهْشانْ
نْتا بَرَّاني راك تْبانْ
جيتي .. جيتْ لْيَدِّيَا ..
داروا بيَّا صْحابْ دَّوَّار
شَدُّني قالوا شفارْ
زاوَكْتْ ليهم دَرْتْ لْعارْ
شيخ محند جا مْعَ لَكبارْ
بْدا ئسوَّلْ يخزر فيا ..
شْكون نْتا جيتي وَحيدْ
تْبانْ غْريبْ فين راك تْزيدْ
قَلْتْ أنا من ايت عبد الحميد
حْنا جَمْرا دَّوَّبْ لَحْديد
عَنَّقْني.رحب بيَّا ..
بَتْ عَنْدو حتى لْنَصْ نْهارْ
وَلَّيتْ صْديقْ ما بْقا خطارْ
وَدْعوني لَكْبارْ وصْغارْ
شيخ محند وجْهُو صْفارْ
قالَّي بَلْخيرْ عاوَدْ عْلِيَّا ..
